O programa pioneiro na divulgación do jazz que realizaba Televisión Española nos anos oitenta chamábase ‘Jazz entre amigos’. Con esa idea do vínculo emocional que xera esta clase de música e a afinidade de persoas diversas cun nexo de unión claro créase o ‘Hot Club de Jazz’ en Laxe. O obxectivo primeiro é organizar e facer máis grande o festival Atalajazz que se celebra cada verán. Outras metas veñen despois. No camiño, moita festa, como a que houbo o pasado venres 21 no bar Escarabello, que serviu de acto fundacional para a asociación.

A directiva compóñena nove persoas; o presidente, Víctor García Pose; o vicepresidente, Javier Facal; a secretaria, Cristina Vázquez; o tesoureiro, Xavier García Lema; e os vocais Antonio Bello, Emma Rodríguez, José Eugenio Bello, Castor Montes e Antonio Mosqueira. Ademais, o colectivo xa ten vinte socios.

Cristina Vázquez, que tamén é técnico de Cultura do Concello, adianta que pensan facer unha festa similar cando se achegue o verán, malia que aínda está por confirmar. O que si é seguro é que para despois do festival Atalajazz programaranse “ciclos de cine, concertos e obradoiros”. A ‘materia prima’ principal será o jazz, pero a acción deste colectivo está “aberta a outros xéneros”. Abofé que a iniciativa terá éxito se segue polo camiño que se apuntou na festa fundacional, onde se encheu o bar e “houbo xente que se tivo que quedar fóra”.

Novas relacionadas

• Colleitando música galega: Lamatumbá.
• Colleitando música galega: Dios ke te crew.

Fonte

• Nova cedida polo semanario redactada por Luis Soto.